Raflandsdeildin í borðtennis

Raflandsdeildin í borðtennis og breytingar á fyrirkomulagi 2. deildar karla

Á formannafundi BTÍ þann 2. september var kynnt nýtt samstarf BTÍ og  Raflands. Keppnistímabilið 2017-2018 munu 1. deildir karla og kvenna í borðtennis kallast Raflandsdeildirnar og verða sigurliðum deildanna tveggja veitt verðlaun í boði Raflands í lok tímabilsins. Ánægja er með þetta samstarf og vonast stjórn BTÍ til þess að deildin og samstarfið verði öllum til sóma.

Á fundinum var einnig farið yfir nýtt keppnisfyrirkomulag fyrir 1. og 2. deild karla. Eftir ábendingar leikmanna síðasta vor, annars vegar um að núverandi keppnisfyrirkomulag væri óþarflega tímafrekt en hins vegar um að tvíliðaleikur væri einnig mjög skemmtilegur hluti leikjanna, var ákveðið að taka upp ólympíska liðakeppni.

Helstu kostir þessa kerfis er að liðsmenn keppa allir jafn marga leiki, heildarleikur samanstendur bæði af einliðaleikjum og tvíliðaleik og heildarleikur getur mest orðið fimm einstakir leikir, en ekki sjö eins og áður.

Sjá má hvernig ólympísk liðakeppni er leikin á eftirfarandi vefslóð, efst á bls. 2, sjá hér

Áformað er  að breyta leikformi 1. deildar kvenna og hafa hana með sama sniði og 1. deild karla haustið 2018 ef vel tekst til í karladeildunum. Þannig er áætlað að minnsti leikmannafjöldi í hverju kvennaliði aukist úr tveimur konum í þrjár konur haustið 2018.

Annað atriði sem kynnt var til sögunnar á fundinum var að mjög hart verður tekið á skilum á skráningargjöldum vegna deildarkeppninnar. Kostnaður á lið, hvort sem er í Raflandsdeildinni eða 2. deildinni er 10.000 kr. Þessi kostnaður er innheimtur til að greiða yfirdómurum á deildarhelgum.

Þau félög sem halda deildarhelgar skulu útvega yfirdómara, þannig að á hverri stundu sé einn yfirdómari til staðar sem sé ekki keppandi, og greiðir BTÍ 20.000 kr. til dómaranna fyrir keppnishelgina fyrir dómgæslu í Raflandsdeildinni og 2. deildinni. Félög geta að sjálfsögðu ráðið því hvort einn yfirdómari sér um dómgæsluna eða hvort tveir eða fleiri skipta henni milli sín. Í úrslitakeppninni næsta vor verður yfirdómara greidd 10.000 kr. þóknun fyrir hverja heildarviðureign (hvert leikkvöld). Stjórn BTÍ vill hvetja félög sem halda úrslitaviðureignirnar til að útvega yfirdómara á þær sem eru ekki skráðir leikmenn þeirra félaga sem etja kappi.

Skráningarfrestur liða í deildirnar, ásamt nöfnum liðsmanna, er 23. september næstkomandi. Greiðslur vegna liðanna skulu berast á reikning BTÍ í síðasta lagi tveimur dögum fyrir upphaf keppni, þ.e. 28. september (rkn. 0334-26-050073, kt. 581273-0109).

Fyrsta keppnishelgin er 30. september-1. nóvember nk. og fer fram í íþróttahúsi Hagaskóla. Lið sem ekki hafa greitt fyrir upphaf keppni munu tapa sínum fyrsta leik með mesta mögulega mun. Hafi félagið ekki greitt fyrir næsta leik sinn mun hann fara eins, o.s.frv.

Félög sem halda keppnishelgar í flokkakeppninni hafa val um hvort spilað verður á einum eða tveimur dögum. Líklegt þykir þó að flest félög muni velja tvo keppnisdaga, vegna borðafjölda og fleiri atriða. Tímasetningar vegna þessa óskast sendar á mótsstjórn BTÍ (bordtennis@bordtennis.is) í síðasta lagi 10 dögum fyrir keppnishelgi, og verða þá birtar um hæl á vef BTÍ, svo leikmenn geti stýrt tíma sínum betur.

Að lokum er bent á að unnið er hörðum höndum við að gera breytingar á núverandi reglugerð um flokkakeppni BTÍ, m.a. vegna hins nýja fyrirkomulags um félagaskiptaglugga og nýrra reglna um tímabundna lánssamninga. Breytingarnar verða birtar í síðasta lagi 10. september.

 

Með von um gott samstarf og jákvæðan og spennandi borðtennisvetur,

Kær kveðja,

Stjórn BTÍ

TENGDAR FRÉTTIR