Samkomubann hefur verið sett á hérlendis vegna kórónuveirunnar í fjórar vikur frá miðnætti 15.mars.  Hefur BTÍ tekið ákvörðun um að fresta eftirfarandi viðburðum á vegum Borðtennissambandsins Íslandsmót unglinga, Íslandsmót öldunga, lokamót Grand Prix og úrslitakeppni 2. deildar. Stjórn BTÍ mun taka ákvörðun í samráði við forsvarsmenn félaganna á næstunni hvenær stefnt verði að því þessir viðburðir fara fram og verður um það fjallað á stjórnarfundi BTÍ næstkomandi þriðjudag 17. mars. Mun allra leiða vera leitað til að halda þessi mót á þessu keppnistímabili og að þau falli ekki niður.

Auk þess hefur verið sett takmörkun á skóla og frístundastarf og falla æfingar hjá íþróttafélögum þar undir. Um er að ræða kröfu um tveggja metra fjarlægð milli einstaklinga, að iðkendur séu aldrei fleiri en 20 í sama rými og að iðkendahópar blandist ekki við komu og brottför. Íþróttahreyfingin og sveitarfélög funda nú stíft um þessi mál og vinna að útfærsluleiðum og skýrast þessi mál vonandi í byrjun næstu viku. Eru þau félög sem ætla að halda úti æfingum hvött til að takmarka fjölda á æfingum, hreinsa reglulega alla fleti og ef hægt er að hafa eitt borð á milli leikmanna eða hafa borð í tveggja metra fjarlægð frá hvoru öðru á æfingum. Einnig að sótthreinsa fleti í lok hverrar æfingar.  Áréttar BTÍ að allir fari að leiðbeiningum almannavarna í þessu efni.  Við útfærslu hafi félögin tilgang samkomubannsins í huga sem er eftirfanandi: 

Smitum á Íslandi fjölgar dag frá degi og svokölluðum þriðja stigs smitum einnig. Þá eru dæmi um smit sem ekki hefur tekist að rekja til utanferða annarra einstaklinga. Þetta gefur vísbendingu um að hætta sé á að COVID-19 geti nú farið að smitast hraðar milli fólks en hingað til. Á sama tíma er hópur starfsmanna Landspítala í sóttkví og gæti frekari útbreiðsla faraldursins dregið úr getu spítalans til að sinna hlutverki sínu. Því er það mat sóttvarnalæknis að nú sé rétti tíminn til að grípa til nauðsynlegra aðgerða til að hægja á faraldrinum til að auka líkur á því að heilbrigðiskerfið geti sinnt þeim sem veikjast af COVID-19 ásamt því að sinna annarri bráðaþjónustu.

BTÍ vill árétta að allir aðilar fari að leiðbeiningum almannavarna. Einnig að vera duglegir að hreyfa sig þó að æfingar kunni að falla niður hjá félögunum.  Það er sem betur fer gott veður þessa dagana og því tilvalið að fara út að hjóla, skokka eða ganga.

Heimasíður með upplýsingum um aðgerðir almannavarna:

https://www.landlaeknir.is/

https//www.covid.is