Automatic translation by Google Translate. We cannot guarantee that it is accurate.

Ferð íslenska unglingalandsliðsins U15 til Riga í Lettlandi dagana 15.-17. febrúar 2019

Dagana 15.-17. febrúar 2019 fór fríður hópur íslenskra borðtennisspilara til Riga í Lettlandi til að keppa í Riga City Council Cup. Leikmennirnir sem fóru utan voru þeir

  1. Alexander Ivanov
  2. Agnes Brynjarsdóttir
  3. Alexía Kristínardóttir Mixa
  4. Berglind Anna Magnúsdóttir
  5. Sól Kristínardóttir Mixa
  6. Harriet Cardew
  7. Birkir Smári Traustason
  8. Eiríkur Logi Gunnarsson
  9. Heiðmar Örn Sigmarsson
  10. Kristófer Júlían Björnsson
  11. Matiss Meckl
  12. Steinar Andrason
  13. Trausti Freyr Sigurðsson

Með í för fór Tómas Ingi Shelton unglingalandsliðsþjálfari og honum til aðstoðar þau Auður Tinna Aðalbjarnardóttir og Jóhannes Bjarki Urbancic auk þess sem nokkrir foreldrar leikmanna voru með í för. Á mótinu keppa leikmenn frá ýmsum þjóðum, m.a. Englandi, Noregi, Azerbjaijan, Hvíta Rússlandi, Eistlandi, Lettlandi, Póllandi, Rússlandi, Úkraínu, Uzbekistan og Færeyjum en frændur okkar Færeyingar senda nú í fyrsta sinn keppnislið á mótið. Er þetta annað árið sem Ísland sendir hóp á mótið.

Mótið er sterkt. Á fyrsta degi (föstudegi) keppti aðeins Alexander Ivanov í Mini Cadet (U12 ára) og var þetta fyrsta keppni hans utan landsteinanna. Stóð hann sig vel og vann hann þrjá leiki á mótinu og hefði hann auðveldlega getað unnið fleiri með meiri reynslu.

Á öðrum degi (laugardegi) kepptu allir íslensku þátttakendurnir í cadet flokki og margir á sínu yngsta ári þar. Keppni hófst snemma morguns og var keppt allan daginn og langt fram á kvöld. Fyrirkomulag keppninnar var breytt frá því í fyrra og ekki lengur keppt um öll sæti. Fengu leikmenn því mismunandi marga leiki og miserfiða. Birkir Smári sem einnig var að keppa á sínu fyrsta móti erlendis. Vann hann einn leik og margar lotur í einstökum viðureignum. Alexía og Berglind fengu erfiða leiki og héldu áfram að safna í reynslubankann. Var Alexía nálægt því að vinna stúlku úr norska unglingalandsliðinu en tapaði tæpt 3-2 í hörkuleik. Hjá Harriet skiptust á skin og skúrir. Spilaði hún mjög vel og vann góða sigra gegn sterkum spilurum en á móti öðrum fann hún sig ekki alveg. Spilaði hún rétt og barðist alltaf vel. Þær Agnes og Sól áttu frábæran dag á sínu yngra ári í flokknum og komust þær lengst áfram í keppninni af stelpunum. Sól vann fleiri leikmenn en sýnu lengra náði hún Agnes sem vann sterka leikmenn og endaði ofar í töflunni. Ekki slæmt en þær eiga báðar tvö ár eftir í flokknum. Þeir Kristófer Júlían og Steinar áttu fínan dag. Unnu þeir góða sigra þar sem þeir spiluðu vel. Kristófer lenti í því að brjóta spaðann sinn í beinni útsendingu en náði sér á strik, lærði af því og kom sterkur til baka í síðustu leikjunum. Þeir Trausti og Heiðmar áttu lærdómsríkan dag. Þeir fengu erfiða leiki við sterka og óvenjulega leikmenn (varnarspilara og choppera) og tóku margar lotur yfir daginn. Þeir Matiss og Eiríkur léku báðir vel. Matiss vann nokkra leiki og tapaði tæpt í síðasta leik sínum gegn sterkum leikmanni. Eiríkur náði lengst allra af drengjunum og á hann enn eftir eitt ár í flokknum.

Á þriðja degi (sunnudegi) kepptu cadet leikmenn í junior flokki (flokki 16-18 ára). Sjö leikmenn náðu að vinna leiki í junior flokki og fara þeir leikir í reynslubankann.

Hópurinn heldur heim á sunnudeginum, þreytt en ánægð og reynslunni ríkari. Hefjast að nýju stífar æfingar heima fyrir Íslandsmótin framundan í mars.

Aðrar fréttir