Í tilefni af tilkynningu ríkisstjórnarinnar fyrr í dag um samkomubann sem nær til samkoma sem eru yfir 100 manns að stærð, frá 15. mars til 12. apríl nk. vill Borðtennissamband Íslands koma því á framfæri að verið er að skoða áhrif bannsins á borðtennisstarfið á landinu næstu vikur og mánuði.

Málið verður tekið fyrir á stjórnarfundi næsta þriðjudag.

Stjórnin ræddi saman fyrr í dag og nálgunin nú að bannið þurfi ekki að hafa áhrif á lokamót grand prix laugardaginn 21. mars nk. þar sem ljóst sé að færri en 100 manns taka þátt í viðburðinum. Sú afstaða kann að breytast og mun hún taka mið af leiðbeiningum stjórnvalda (Ríkisstjórn, sóttvarnarlæknir og ÍSÍ).

Allar líkur eru á því að fella þurfi niður Íslandsmót öðlinga skv. tilmælum ÍSÍ en ekki er hægt að tryggja 2 metra fjarlægð á mótinu milli leikmanna sem sumir hverjir teljast í áhættuhóp.

Hins vegar þykja allar líkur á að fresta þurfi Íslandsmóti unglinga, þar sem þátttakendur og áhorfendur ná oft um 200 manns og mótið fellur innan tímabilsins. Til greina kemur að mótinu verði frestað um 4 vikur, með fyrirvara um að samkomubannið verði ekki framlengt. Nánari upplýsingar um það síðar.

Stjórnin biður keppendur um að þakka fyrir leiki með hneigingum í tveggja metra fjarlægð í stað handabands.

Sú tilkynning barst jafnframt frá ETTU fyrr í dag að undankeppni Evrópumótsins í liðakeppni sem fram átti að fara í apríl falli niður en öllum alþjóðlegum viðburðum í borðtennis hefur nú verið frestað í allavega sjö vikur.

Hér að neðan eru leiðbeiningar frá ÍSÍ vegna Covid 19 veirunnar

Almennar forvarnir vegna COVID-19

  1. Kynntu þér og fylgdu leiðbeiningum og tilmælum Almannavarna/Embættis landlæknis
  2. Forðastu að heilsa með handabandi, faðmlagi og kossum
  3. Fylgdu leiðbeiningum um hreinlæti, s.s. handþvott og sprittun
  4. Forðastu að snerta eigin augu, nef og munn
  5. Forðastu að deila drykkjum, borðáhöldum
  6. Hafðu a.m.k. 2 metra á milli þín og annarra einstaklinga
  7. Forðastu snertingu við fólk sem er veikt
  8. Vertu meðvituð um einkenni viðkomandi veiru/inflúensu:Hósti Hiti, Bein og vöðvaverkir, Þreyta og slappleiki
  9. Vertu heima ef tilmæli eru um það
  10.  Gerðu áætlun til að tryggja að aðstoð sé til staðar (t.d. til að ná í vistir, lyf eða aðrar nauðsynjar)
  11. Notaðu andlitsgrímu til að koma í veg fyrir veirudreifingu á milli heimilismanna eða annarra í samfélaginu 
  12. Þegar þú ert veik/veikur skaltu vera í burtu frá öðrum eins mikið og mögulegt er til að forðast að smita annað fólk 

Stjórn BTÍ