Kína heimsmeistari í liðakeppni kvenna

Kínverska kvennalandsliðið varð heimsmeistari í liðakeppni kvenna í 21. skipti, með 3-1 sigri á liði Japan í úrslitum á HM í Halmstad í Svíþjóð.

Mima Ito kom Japan í forystu þegar hún vann Liu Shiwen 12-10 í oddalotu í fyrsta leiknum. Kínversku konurnar unnu næstu þrjá leiki og tryggðu Kína heimsmeistaratitilinn. Ding Ning vann Miu Hirano 3-0, Zhu Yuling vann Kasumi Ishikawa 3-0 og Liu Shiwen lagði Miu Hirano 3-0.

Hong Kong og sameiginlegt lið Norður- og Suður-Kóreu fengu bronsverðlaunin. Kína vann Hong Kong 3-1 í undanúrslitum og Japan vann Kóreu 3-0 í hinum undanúrslitunum.

Mikla athygli vakti á mótinu þegar kóresku ríkin ákváðu að tefla fram sameiginlegu liði í seinni hluta mótsins en liðin áttu að leika innbyrðis í átta liða úrslitum.

Mynd af kínversku konunum með þjálfara sínum af vefsíðu ITTF.

 

ÁMU

TENGDAR FRÉTTIR