No image

Borðtennishluti Reykjavíkurleikanna (RIG) fór fram í dag í TBR húsinu í Laugardal. Keppnin var hin glæsilegasta þar sem hátt í 30 keppendur frá fjórum löndum tóku þátt. Spilað var með einföldum útslætti og þurfti sigur í fjórum lotum til að vinna leik.

Í karlaflokki mættust í undanúrslitum Víkingarnir Magnús Jóhann Hjartarson og Ársæll Aðalsteinsson annars vegar og svo Ellert Kristján Georgsson í KR og Jóhannes Bjarki Tómasson í BH hins vegar. Leikirnir fóru þannig að þeir Magnús og Ellert sigruðu í sínum leikjum eftir harða baráttu og mættust því í úrslitaleik. Eftir framlengingu í síðustu lotu vann Ellert viðureignina og stóð því uppi sem sigurvegari í karlaflokki.

Í kvennaflokki mættust Agnes Brynjarsdóttir og Stella Karen Kristjánsdóttir í öðrum undanúrslitaleiknum en þær eru báðar úr Víkingi. Agnes sigraði þá viðureign og mætti í úrslitum Nevenu Tasic úr Víkingi sem sigraði Ársól Arnardóttur úr KR í hinum undanúrslitaleiknum. Leikur Nevenu og Agnesar var nokkuð jafn þar sem hver lota vannst naumlega en Nevena vann viðureignina og sigraði í kvennaflokki.

Karlaflokkur

1. Ellert Kristján Georgsson, KR

2. Magnús Jóhann Hjartarson, Víkingur

3.-4. Ársæll Aðalsteinsson, Víkingur og Jóhannes Bjarki Tómasson, BH

Kvennaflokkur

1. Nevena Tasic, Víkingur

2. Agnes Brynjarsdóttir, Víkingur

3.-4. Stella Karen Kristjánsdóttir, Víkingur og Ársól Arnardóttir, KR